أنا ميار زوجة “المهندس كارم دهشان”، أو الـ ملحقتش أكون زوجته إلا على الورق.
ليلة زفافنا انتظرناها كتير أوي، سنة ونص خطوبة انتهت على كارثة بشعة فقدته فيها بطريقة غريبة وغامضة.
كارم شخص عصبي لأبعد، تعايشت مع العيب ده بعد عشرتي له ولما عرفت قد إيه هو شخص بيطلع يطلع وينزل على مفيش زي ما بيقولوا.
عنده مشاكل كتير في شغله وفي صداقاته وأهله بسبب العصبية، كان عندي أمل لما يجمعنا بيت واحد أقدر أغيره، لكن الـ حصل إني ملحقتش احقق اي حاجة من أحلامي وأحلامه.
ليلة فرحنا كانت كلها توتر وشد وجذب بين عيلتي وعيلته، واعتقد دي حاجة طبيعية بتحصل في كل العائلات.
بس الموضوع تصاعد بين كارم وبين أخويا الحسن، اختلفوا سوا على موضوع القايمة وصوتهم علي قصاد الناس لولا المأذون تدخل ووصلهم لحلول وسط ترضي الجميع والدنيا تيسرت.
كنت همىوت من القلق والخوف لا كارم ينشف دماغه وعصبيته تنسيه حبنا، لكن مع أخر نظرة بص لي بيها اطمنت أنه بيقولي “متخافيش”.
الموضوع انتهى ووالدي قال كلمتين بايخين لكارم وساب الفرح ومشي، ووراه مشي أخويا الحسن هو كمان.
أول ما وصلنا البيت كنت منهارة وحزينة أن اهلي سابوني في يوم زي ده، وكارم كان بيحاول يهديني ويقولي أنه هيصلح كل شيء.
لحد ما قالي “هنزل أجيب حاجة من تحت وراجع على طول”
معرفش ليه قلبي اتقبض!
حسيت بخوف من فكرة أنه هيسبني في الوقت ده بالتحديد، ماكنتش أعرف هو نازل يقابل مين ولا هيعمل إيه، لكني كنت شايفاه بيعمل مكالمات شات كتير طول الطريق كأنه بيحضر لي مفاجأة.
نزل كارم ودخلت فكيت طرحتي وانشغلت شوية في شيل الدبابيس، بس مخدتش بالي أن فات حوالي نص ساعة وكارم لسه مطلعش!
اتصلت عليه وانا قلقانة يكون عمل مشاكل مع الجيران ولا حصل حاجة معرفهاش، خصوصًا عم مدحت جارنا في الدور الأرضي راجل سكير ومش مظبوط وكارم اتخانق معاه أكتر من مرة أثناء ما كنا بنجيب العفش.
تليفونه رن مرتين بعدين اتقفل!
انتظرت أسوأ عشر دقايق في حياتي
متوترة
قلقانة
مش عارفة جوزي فين
وإزاي يغيب عني في وقت زي ده
مقدرتش أمنع نفسي أنزل ابص عليه حتى في حوش العمارة
بس مجرد ما فتحت باب الشقة لقيت جارتي الـ قدامي بتبصلي بنظرات غريبة وقفلت الباب في وشي!
ودي أول مرة أشوفها فيها عامة، ومعرفش ليه كانت بتبصلي بالشكل ده والمفترض إني لسه بفستان الزفاف على الأقل تباركلي زي أي حد هيعمل كده.
