عام

اختلفوا سوا على موضوع القايمة، والنتيجة…!

تجاهلت الـ حصل وناديت من على السلم بصوت واطي حبتين علشان محدش يسمع في العمارة “كااارم.. كااارم أنت هنا؟”

لما مردش عليا ومسمعتش حد، نزلت اتسحب بشويش وطرحتي على راسي ماسكاها بأيدي عشوائي، وكانت صدمة عمري لما لقيت كارم مرمي في حوش العمارة سايح في دمه ومفيش حد حواليه!

جريت عليه مش مصدقة عيوني، راسه على رجلي وصوتي مش طالع من حنجرتي

“كاااااارم.. كاااااارم متهزرش … بالله عليك أوعى تعمل فيا كده … كاااارم أنت وعدتني مش هتسبني أبدًا … صدقني مش هينفع .. والله ما هينفع دلوقتي خالص .. قوم يلا أنا شربت المقلب خلاص ومش هعلي صوتي علشان الجيران ميتلموش وتتعصب عليا … يلا قوم”

مبيقومش!

مبيتحركش!

دمه بيسيل على فستاني ومش راضي يتكلم.

صوتي مكتوم

مش قادرة أصرخ وأقول لحد يلحقني

مين ممكن  غيره!

تليفون كارم كان في الأرض جنبه، ومفتوحة على مكالمة مع أخويا الحسن!

معقول هو الـ استدرجه ولما نزل قتىله انتقامًا لوالدنا؟

محدش كان بيبص لكارم بـ شر غيره طول الفرح

مسكت التليفون وانا بقوله بصوت مرتجف “ارتحت يا الحسن؟ طب ليه!”

الحسن كان عمال يقول “الوو.. الووو ” ولما سمع صوتي مكتوم وبالشكل ده بقا عمال يقولي “في إيه انطقي.. كارم ماله يابنتي كان بيرد عليا دلوقتي”

خطة ممتازة علشان اصدق أنه برا الموضوع، رميت التليفون على الأرض وسمعت صوت  عم مدحت بتتفتح ورايا، بصيت له وهو خارج بيتطوح ويضحك وقالي “إيه ده عروسة.. قاعدة كده ليه قومي قومي.. العروسة بتقعد في الكوشة عيب مش في الحوش”.

كنت عايزة استنجد بأي حد يلحقني، قولتله بصوت ضعيف “ألحقني.. عايزة حكومة بسرعة.. جوزي مات”

ضحك وهو بيلف حوالين نفسه وبيقولي “أعملي كده بالفستان هتبقي جميلة زي العروسات.. بصي بصي لفي كده كده قومي”

كان بيقرب مني علشان يسندني وهو بيطوح يمين وشمال

شدني بالقوة من راسي

صرخت فيه لما قومت وقولتله “جوزي ميييييييت أنت مبتفهمش.. مش شايف.. مبتحسش”

وقف ساكت بيدور بعينه في الحوش وبيدعك في وشه وقال “فين.. فين الميت أنتي عايزة تفوقيني من الدماغ ليه ياعروسة فقر أنتي، على فكرة كارم بيه كده ميحبكيش.. أنتي نكدية وفصيلة”

فقدت الأمل في مساعدته، قعدت مكاني وأنا ببص له بوجع وخيبة أمل بتمنى لو كان هو القتيىل مش جوزي، مديت أيدي أحط راس كارم على رجلي وأنا باصة لعم مدحت وبقوله “كارم بيه خلاص.. مش هنا.. سابني في دنيا فيها أمثالك”..

لكن فجأة لقيت أيدي بتدور في الفراغ!

جثة كارم مش ورايا ومش موجودة!

أنا بلمس الهوا

بلمس السراب بأيدي

في نفس اللحظة دخل عليا الحوش أخويا الحسن

شافني قاعدة مصدومة وبفتش بأيدي في الأرض زي المجانين

شدني وهو بيعدل على راسي طرحتي بعد ما شاف مدحت واقف بيضحك ورايا وبيغني وقالي بصعبية “انتي بتعملي ايه هنا.. فين جوزك من كل ده”

كان بيطلعني السلم غصب عني وأنا عيني متعلقة على نفس المكان الـ اختفت فيه جثىة جوزي من غير ما اعرف راحت فين.

لساني مشلول رافض ينطق بأي كلام

بتمنى لو كانت جثىته فعلاً سراب وهيرجعلي بعد شوية.

الحسن ماكنش فاهم حالتي، وبين كلامه سمعته بيقولي “ولما هو مش متنيل موجود بيتصل يخليني أجي ليه، هو شغل عيال من أولها.. بقاله ساعتين بيزن تعالى تعالى وفي الأخر اجي الاقيه سايبك في الشارع.. هو يقصد إيه بالظبط بالحركة دي.. لو مش عايزك وبيستعيل يقولها بنفسه وأنا ــــــــ”.

جرس الباب رن قطع كلامه!

أنا وهو بصينا ناحية الباب

راح الحسن يفتح ومع كل خطوة قلبي بيتاكل فيها، مش عايزة خبر عن كارم وحش، مش عايزة حد يقولي شدي حيلك.. عايزاه هو يرجعلي.

أول ما فتح الحسن سمعته بيقول “بقا ده كلام يعني.. سايب مراتك في الشارع كل ده وترمي تليفونك كمان”

اول ما سمعته بيخاطب كارم، جريت عليه زقيته بعيد علشان أشوفه بعيني واقوله إني عيشت اسوء عشر دقايق من عمري في غيابه.

بس للأسف

أنا ملقتش كارم!!

كان إيهاب

خطيبي القديم وأكتر واحد كرهته وأذاني في الدنيا!

يتبع*****

سؤال القصة ” هل ميار بتهلوس وهي في الأساس تزوجت إيهاب مش كارم، ولا كارم صابته لعنة يوم فرحه لذلك بتشوفه في شكل أكتر حد بتكرهُ!”

(حاسة كده إننا على بداية سلسلة تحفةةةةةة من بتوع الزمن الجميل، منتظرة رأيكم وتحليلاتكم للقصة)

2 من 2التالي
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى